पुणे : वैद्य हरीश पाटणकर यांच्या संकल्पनेतून आणि ‘बीव्हीजी इंडिया’च्या सहकार्याने साकारलेल्या ‘केशायुर्वेद’ या भारतातील पहिल्या आयुर्वेदीय हेअर टेस्टिंग लॅब आणि संशोधन केंद्राच्या पहिल्या वर्धापनदिनानिमित्त विविध कार्यक्रमांचे आयोजन करण्यात आले आहे. यामध्ये ‘केशायुर्वेद’च्या राज्यातील तीस उप-केंद्रप्रमुखांचा सत्कार, ‘आयुर्वेदाच्या स्मृतीतून’ या पुस्तकाच्या दुसऱ्या भागाचे प्रकाशन, रससिद्ध अरुणकुमार महाराज यांचे पारद किमया प्रयोग आणि ‘असोसिएशन ऑफ आयुर्वेदिक कॉस्मेटॉलॉजी, ट्रायकॉलॉजी अँड टेक्नॉलॉजी’ची स्थापना अशा कार्यक्रमांचा समावेश आहे.
या कार्यक्रमासाठी प्रमुख पाहुणे म्हणून ‘बुकगंगा’चे संस्थापक मंदार जोगळेकर उपस्थित राहणार आहेत. कार्यक्रमाचे अध्यक्षस्थान ‘बीव्हीजी इंडिया’चे अध्यक्ष हणमंतराव गायकवाड भूषविणार आहेत. आरोग्य विज्ञान विद्यापीठाचे माजी कुलगुरू डॉ. अरुण जामकर, आयुर्वेद व युनानी विद्या शाखेचे अधिष्ठाता डॉ. सतीश डुंबरे, महाराष्ट्र राज्याच्या आयुष विभागाच्या सहायक संचालक डॉ. सरिता गायकवाड या वेळी उपस्थित राहतील, अशी माहिती ‘केशायुर्वेद’चे संचालक वैद्य हरीश पाटणकर यांनी दिली आहे.
वैद्य हरीश पाटणकर म्हणाले, ‘आरोग्यवर्धिनी चिकित्सालय आणि बीव्हीजी इंडिया यांच्या सहकार्यातून सुरू झालेल्या केशायुर्वेद या भारतातील हेअर टेस्टिंग लॅब आणि संशोधन केंद्राने वर्षभरातच राज्यभर सेवा देण्यास सुरुवात केली आहे. राज्यात सध्या तीस उपकेंद्रे सुरू झाली आहेत. त्याचा लाभ रुग्णांना होत आहे. त्या केंद्रप्रमुखांना प्रोत्साहन म्हणून त्यांचा सन्मान करण्यात येणार आहे. ‘आयुर्वेदाच्या स्मृतीतून’ या पुस्तकात आजार आणि त्यावरील घरगुती उपचारपद्धती सांगितल्या आहेत. सौंदर्याबाबत अलीकडे जागरूकता वाढत असून, त्या दृष्टीने काम सुरू केले आहे. त्यासाठी ‘असोसिएशन ऑफ कॉस्मेटॉलॉजी, ट्रायकॉलॉजी अँड टेक्नोलॉजी’चा फायदा होईल.’
कार्यक्रमाविषयी : दिवस : बुधवार, १९ जुलै २०१७
वेळ : सायंकाळी चार ते सात
स्थळ : टिळक स्मारक मंदिर, पुणे
